Home of grace er ein heim for unge jenter som er blitt gravide utanfor ekteskap, og er blitt utstøytt av familien sin. Jentene er mellom 14 og 26 år gamle. Vi fekk prate med dei, og dei er jo heilt normale jenter på vår alder, berre at dei har har ein god del meir problem enn oss. Dei fleste kunne snakke litt engelsk, og vi prøvde sjølvsagt litt Thai med dei, men dei berre lo av oss. Kanskje eit lite hint om at vi ikkje var så flinke. Det var utruleg spesielt å snakke med dei, når ein visste at nokre av dei kanskje hadde blitt valdtekne, eller hadde jobba som prostituerte. Likevel sat dei der på golvet og tulla og lo. Dei hadde absolutt god grunn til å gje opp, men dei holdt motet oppe. To av jentene hadde nettopp fødd ungar då vi kom dit, og vi fekk sjå dei. Utruleg rart å sjå dei ungane, og tenkje på at dei kanskje var uønska. Ei av dei som jobba der, fortalte at nokre av jentene valgte å adoptere bort barnet sitt. Når ein kjem til ein slik plass, og møter jener som har det slik, byrjar ein å tenkje på litt av kvart. Desse jentene har ikkje pengar, fordi dei ikkje har jobb, dei har ikkje familie, kanskje heller ikkje vener. I tillegg har dei ein baby inni seg som dei sannsynlegvis ikkje har råd til å ta vare på, og som dei sikkert ikkje hadde planlagt. Dei har det rett og slett ikkje veldig bra. Så kjem eg dit, rett frå hotellet mitt, med masse pengar i lommeboka, mange vener heime, familie som eg er glad i, og som er glad i meg. Eg har faktisk alt eg treng! Og så skal eg jobbe der.. Eg føler nesten at det er fælt å kome dit, når dei veit at eg er rik, og har det så mykje betre enn dei. Likevel tok dei imot oss med glede og venlighet. Det var sterkt!
Home of praise er ein barnehage midt i slummen, under ei stor bru. Borna som går der er frå 1/2 år til 3 år. Borna der var heilt nydelege! Silje og eg skal jobbe der, og eg gler meg allereie! Eg merka at nokre av borna var veldig redde, og hadde vanskeleg for å møte oss nye, og det var kjemperart å tenkje på at det kan vere fordi dei er vant til at folk ikkje behandlar dei bra. Borna kom frå slummen, og i slummen er det veldig vanleg med alkohol- eller rus-problem. Mange av borna har foreldre som mishandlar dei, og ikkje klarar å ta vare på borna. Silje og meg sine oppgåver der blir å vere nokon som borna kan kome til for å få kos og trøst. For det får dei kanskje ikkje heime. Det blir utruleg spennande å jobbe der!
Immanuel Daghjem er ein barnehage for litt eldre born. Borna der er frå 3 til 6 år. På Immanuel Daghem får dei litt undervisning i engelsk, fiolin og forskjellig anna. Denne barnehagen gjer borna klare til å byrje på skulen, så på den måten får borna eit godt grunnlag for å kome seg ut av slummen. Med utdanning har dei med ein gong større sjanse for å klare seg. Eg skal vere barnehageassistent her nokre dagar i veka.
Omtrent rett utanfor Home of Praise såg vi dette synet: Ein gammal, skrapa bil, med nokre sovande villsvin rundt.
Ein nydeleg gut på Home of Praise.
Og ei nydeleg jente på Home of Praise.
To gravide jenter, og ei nybakt mamma, alle tre omtrent på min alder.
Eg gler meg veldig til å byrje å jobbe, og kome ut av den ovanfrå og ned-turist-tilverelsen eg føler eg er i no.
1 kommentar:
Wow!
Legg inn en kommentar